ပင်လယ်ပြင်လုပ်သားများ ဘောလုံးကွင်းတွင် စီးပွါးရှာရမည်

မကြာခင်ကမှ ဂီရိမုန်းတိုင်းဒဏ် အပြင်းအထန် ခံစားခဲ့ကြရတဲ့ ရခိုင်ပြည်နယ် ကျောက်ဖြူမြို့ရှိ လုပ်ငန်းရှင်ကြီးများကို အနောက်ပိုင်းတိုင်း တိုင်းမှုးက ရက္ခပူရ ဘောလုံးကလပ်အသင်းအတွက်ဆိုသည့် အကြောင်းပြချက်နဲ့ ငွေကျပ် သိန်း ၇၀၀-ကျော်ဖိုး ရှယ်ယာဝယ်ကြဖို့ညွှန်ကြားနေတယ်လို့သိရပါတယ်။ အဆိုပါလုပ်ငန်းရှင်များထဲမှာ ဆားလုပ်ငန်း ၊ ပုဇွန်လုပ်ငန်း ၊ ဆန်လုပ်ငန်းစသည်တို့ပါဝင်နေပြီး လုပ်ငန်းရှင်တစ်ဦးလျှင် ငွေကျပ် ၂၅ သိန်းနဲ့ သန်း ၅၀ အကြား ခွဲတမ်းသဘောမျိုးဖြင့် ရှယ်ယာအ၀ယ်ခိုင်းနေတယ်လို့လဲသိရပါတယ်။ ဂီရိမုန်းတိုင်း ဒဏ်ကြောင့် ဆုံးရှုံးပျက်စီးမှုများနဲ့ ရင်ဆိုင်ခံစားနေကြချိန်မှာ တိုင်းမှုးရဲ့ ညွှန်ကြားချက်နဲ့ လုပ်ဆောင်နေတာကြောင့် လုပ်ငန်းရှင်များအကြား မကျေနပ်မနပ်ဖြစ်နေကြလို့လဲသိရပါတယ်။ ဒေသခံတစ်ဦးကတော့ ပင်လယ်ပြင်ကို အမှီပြုပြီး နှစ်ပေါင်းများစွာ စားသောက်လာခဲ့ကြရာမှ ဘောလုံးကွင်းပြောင်းပြီး စီးပွါးရေးလုပ်ခိုင်းတဲ့ တိုင်းမှုးရဲ့ အကြံအစီဟာ တကယ်ကိုပဲ အသိဉာဏ်ခေါင်းပါးပြီး ပေါကြောင်ကြောင်နိုင်လွန်းလှတယ်လို့ မှတ်ချက်ပြုပြောဆိုသွားခဲ့ပါတယ်။