Posts
ယခုလာမည့် ၂၀၁၁ ခုနှစ် ဇန်န၀ါရီလ ၂၀ ရက်နေ့ နံနက် ၃ နာရီ ၅၂ မိနစ် အချိန်တွင် နက္ခတ်လပြည့်မှုတစ်ကြိမ် ထပ်မံဖြစ်ပေါ်ဦးမည် ဖြစ်ပြီး ဖုသျှနက္ခတ်နှင့် တနင်္လာဂြိုဟ် (လမင်း) စန်းယှဉ်ပူးတွဲမည် ဖြစ်ပြီး တနင်္လာဂြိုဟ်သည် ကရကဋ်ရာသီ၊ တနင်္ဂနွေဂြိုဟ်မင်းသည် မကာရရာသီတွင် ရပ်တည်ကြမည် ဖြစ်သောကြောင့် မြန်မာနိုင်ငံရှိ ရွှေထုတ်လုပ်ရေး လုပ်ငန်းများတွင် ရွှေအထွက် အထူးတိုးလာနိုင်ကြောင်း မြန်မာနိုင်ငံ နက္ခတ်သိပ္ပံအဖွဲ့က ဆိုသည်။
အမှန်တကယ် ပြက္ခဒိန် အလိုအရ ၂၀၁၁ ဇန်န၀ါရီလ ၁၉ ရက်နေ့သည် ဝေါဟာရလပြည့်နေ့ဖြစ်သော်လည်း နောက်တစ်နေ့ ကူးသော ၂၀ ရက်နေ့ မနက် ၃ နာရီ ၅၂ မိနစ်မှ နက္ခတ်လပြည့်ခြင်း ဖြစ်ပေါ်မည် ဖြစ်သည်။ ထိုရက်၌ လမင်းသည် မြန်မာနိုင်ငံအတွင်း ထပ်မံ၍ ၁၉ ရက်နေ့ ည ၁၁ နာရီ ၅၅ မိနစ်မှ ၂၀ ရက်နေ့ မနက် ၀၀ နာရီ ၁၀ မိနစ်အတွင်း ဖြတ်သန်းသွားဦးမည် ဖြစ်သည်။
ထိုသို့ ဖြတ်သန်းရာတွင် ည ၁၁ နာရီ ၅၅ မိနစ်တွင် ထိုင်းနိုင်ငံနှင့် ကရင်ပြည်နယ် နယ်စပ်၊ ၁၂ နာရီ တိတိတွင် ကျိုက်ထီးရိုးဘုရား ရင်ပြင်၊ မနက် ၀၀ နာရီ ၀၂ မိနစ်တွင် ပဲခူးတိုင်းဒေသကြီးအတွင်းရှိ မိုးယွန်းကြီးအင်း၊ ၀၀ နာရီ ၀၅ မိနစ်တွင် သာယာဝတီမြို့၊ ၀၇ မိနစ်တွင် ဧရာဝတီတိုင်းဒေသကြီးအတွင်းရှိ ဟင်္သာတမြို့၊ ၀၉ မိနစ်တွင် ရခိုင်ပြည်နယ် ဂွမြို့ တို့ အပေါ်မှနေ၍ အသီးသီး ဖြတ်သန်းသွားမည်ဟု ကြားသိရသည်။
ယခု ဖြတ်သန်းမှုတွင် တနင်္လာဂြိုဟ်လမင်းနှင့် ဖုသျှနက္ခတ် စန်းယှဉ်ဖြတ်သန်းမှုကြောင့် ထိုနက္ခတ်ဂြိုဟ်ခွင်၏ သဘောအရ ဖြတ်သန်းရာ တိုင်းပြည်များတွင် စည်ပင်သာယာဝပြောမှု၊ စည်းလုံးညီညွတ်မှု၊ ရေရှည်တည်တံ့ခိုင်မြဲမှု၊ တွင်းထွက်သယံဇာတများ အထွက်တိုးမှု စသော ကောင်းကျိုးမင်္ဂလာများနှင့် ပြည့်စုံဖွယ် ရှိသည်ဟု ပြည်တွင်း နက္ခတ်ပညာရှင် အကျော်အမော်များက ဆိုကြသည်။
မြန်မာသက္ကရာဇ် ၁၃၇၂ တန်ဆောင်မုန်းလပြည့်နေ့၊ နိုဝင်ဘာလ ၂၁ ရက်နေ့တွင် တနင်္လာဂြိုဟ် လမင်းသည် ထိုနေ့ည ၁၁ နာရီ ၄၇ မိနစ်အချိန်၌ မြန်မာနိုင်ငံ ချင်းပြည်နယ် ဟားခါးမြို့ပေါ်မှ ဖြတ်သန်းသွားမည် ဖြစ်သောကြောင့် စင်ကာပူမှ ကာစီနိုစီးပွားရေး လုပ်ငန်းရှင်တစ်ဦးသည် ဟားခါးမြို့သို့ လာရောက်ကာ စီးပွားရေး တိုးတက်ကြောင်း နက္ခတ်ဆိုင်ရာ လောကီအစီအရင် တစ်ခု လာလုပ်ခဲ့သည့် သတင်းကို mmDailyNews က ဖော်ပြခဲ့ပြီး ဖြစ်လေသည်။
တနင်္လာဂြိုဟ်လမင်းနှင့် ဖုသျှနက္ခတ် စန်းယှဉ်ဖြတ်သန်းမှု ကြုံရလျှင် သက်ဆိုင်ရာ လုပ်ငန်းနယ်ပယ် အသီးသီးတွင် တကယ်အရည်အချင်း ရှိပါလျက် အောင်မြင်မှု နှောင့်နှေးနေကြသူများသည် အထက်ဖော်ပြပါ နေရာများတွင် အချိန်ကိုက်၍ ကုသိုလ်ကောင်းမှုများ ပြုလုပ်ခြင်း၊ သင့်တော်ရာ ဂါထာများ၊ လောကီအစီအရင်များကို ပြုလုပ်ခြင်းဖြင့် တိုးတက်မှု ကံကောင်းခြင်းများ ရရှိရန် ကံအပြောင်းအလဲများ ကြုံတွေ့နိုင်သည်ဟု ရှေးပညာရှိများ ဆိုခဲ့ကြလေသည်။
မြန်မာနိုင်ငံ၏ ရေမြေအနေအထားအရ ဖြစ်နိုင်ခြေများကို သုံးသပ်ရလျှင် ရွှေကျင်မြို့တွင် ရွှေအထွက်တိုးခြင်း၊ ရွှေကြောသစ်များ တွေ့ခြင်း၊ ဂွမြို့တွင် သဘာဝဓာတ်ငွေ့နှင့် ရေနံဆိုင်ရာ ကောင်းကျိုးများ တိုးတက်ဖွယ် ရှိသည်ဟု မှန်းဆနိုင်ပေသည်။
လာမည့် ဇန်န၀ါရီလ ၂၀ ရက်နေ့ မနက်အစောပိုင်းတွင် ဖြစ်ပေါ်မည့် လမင်းနှင့် ဖုသျှနက္ခတ် စန်းယှဉ် ရပ်တည်မှု၏ အားအကောင်းဆုံး ဖြတ်သန်းရာ ဒေသသည် ဆော်ဒီအာရေဗျ နိုင်ငံ မက္ကာမြို့နှင့် အနီးတစ်ဝိုက် ဖြစ်မည် ဖြစ်ပြီး ကမ္ဘာ့ရေနံဈေးကွက်တွင် ဆော်ဒီအာရေဗျနိုင်ငံ၏ အနေအထား ထပ်မံကြီးမြင့် လာဖွယ် ရှိမည်ဟု ခန့်မှန်းနိုင်ပေသည်။
0 comments:
Post a Comment